تہران: ایرانی نیشنل سکیورٹی کونسل کے سربراہ ابراہیم عزیزی نے سخت انتباہ جاری کرتے ہوئے کہا ہے کہ آبنائے ہرمز میں کسی بھی قسم کی امریکی مداخلت کو جنگ بندی کی خلاف ورزی تصور کیا جائے گا۔ امریکی صدر ڈونلڈ ٹرمپ کے حالیہ بیان پر شدید ردِ عمل دیتے ہوئے انہوں نے واضح کیا کہ آبنائے ہرمز اور خلیج فارس کا انتظام ٹرمپ کے فریب دینے والے بیانات سے نہیں چلایا جا سکتا۔
ابراہیم عزیزی کا کہنا تھا کہ ان حساس سمندری حدود کے معاملات میں کسی قسم کی بیان بازی کی گنجائش نہیں ہے۔ یاد رہے کہ امریکی صدر نے سوشل میڈیا پر ‘پراجیکٹ فریڈم’ کے آغاز کا اعلان کیا ہے، جس کا مقصد مشرقِ وسطیٰ کے وقت کے مطابق آج صبح سے آبنائے ہرمز میں پھنسے غیر جانبدار ممالک کے جہازوں کو محفوظ راستہ فراہم کرنا اور انہیں وہاں سے نکالنا ہے۔ ایران کی جانب سے اس امریکی منصوبے کو اپنی خود مختاری اور علاقائی سلامتی کے خلاف قرار دیا جا رہا ہے، جس سے خطے میں تناؤ مزید بڑھنے کا خدشہ ہے۔
