کراچی (سپورٹس رپورٹر) ایچ بی ایل پی ایس ایل 11 کے ایک انتہائی اہم اور سنسنی خیز مقابلے میں لاہور قلندرز نے راولپنڈیز کو 32 رنز سے شکست دے کر اسے ٹورنامنٹ کے پلے آف مرحلے کی دوڑ سے باہر کر دیا ہے۔ کراچی کے نیشنل بینک کرکٹ اسٹیڈیم میں کھیلے گئے اس میچ میں لاہور قلندرز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 4 وکٹوں کے نقصان پر 210 رنز کا پہاڑ جیسا مجموعہ ترتیب دیا، جس میں فخر زمان نے جارحانہ بیٹنگ کرتے ہوئے 54 گیندوں پر 84 رنز کی نمایاں اننگز کھیلی جبکہ محمد فاروق نے بھی ان کا بھرپور ساتھ دیتے ہوئے 41 گیندوں پر 63 رنز اسکور کیے۔ راولپنڈیز کی جانب سے محمد عامر اور رضا اللہ نے دو، دو کھلاڑیوں کو آؤٹ کیا لیکن وہ لاہور کے بلے بازوں کو بڑا اسکور کرنے سے نہ روک سکے۔ 211 رنز کے بڑے ہدف کے تعاقب میں راولپنڈیز کی ٹیم شروع سے ہی دباؤ کا شکار نظر آئی اور اس کی وکٹیں وقفے وقفے سے گرتی رہیں، اگرچہ یاسر خان نے 29 گیندوں پر 58 اور سعد مسعود نے 26 گیندوں پر 54 رنز بنا کر مزاحمت کی کوشش کی لیکن وہ اپنی ٹیم کو جیت دلانے میں ناکام رہے اور پوری ٹیم مقررہ اوورز میں 9 وکٹ پر 178 رنز تک ہی محدود رہی۔ لاہور قلندرز کی جانب سے حارث رؤف نے تباہ کن باؤلنگ کرتے ہوئے تین وکٹیں حاصل کیں جبکہ کپتان شاہین آفریدی اور اسامہ میر نے دو دو مہروں کو میدان سے باہر بھیجا، اس فتح کے ساتھ ہی لاہور قلندرز نے پلے آف کے لیے اپنی پوزیشن مزید مستحکم کر لی ہے۔
