اٹک کے علاقے بسال میں کرکٹ میچ کے دوران ایک انتہائی افسوسناک اور دلخراش واقعہ پیش آیا ہے جہاں کھیل کے میدان میں مصروفِ عمل ایک نوجوان کھلاڑی اچانک دل کا دورہ پڑنے سے خالقِ حقیقی سے جا ملا، ریسکیو حکام کی جانب سے فراہم کردہ تفصیلات کے مطابق پنڈی گھیب کے قریبی گاؤں کسراں سے تعلق رکھنے والا نوجوان کرکٹر امان اللہ ریلوے گراؤنڈ بسال میں میچ کھیل رہا تھا کہ جب وہ بیٹنگ میں مصروف تھا تو اسی دوران اسے اچانک سینے میں شدید تکلیف اور دل کا دورہ پڑا جس کے باعث وہ گراؤنڈ میں ہی گر پڑا، ابتدائی اطلاعات کے مطابق گراؤنڈ میں موجود کھلاڑیوں اور مقامی افراد نے فوری طور پر اسے سنبھالنے اور ہسپتال منتقل کرنے کی بھرپور کوشش کی تاکہ اس کی زندگی بچائی جا سکے لیکن بدقسمتی سے وہ ہسپتال پہنچنے سے قبل ہی راستے میں زندگی کی بازی ہار گیا، اس ناگہانی واقعے کے بعد پورے علاقے میں سوگ کی لہر دوڑ گئی ہے اور کھیل کا میدان جہاں تھوڑی دیر پہلے خوشیاں تھیں وہاں اب اداسی کا راج ہے۔
