پاکستان کرکٹ بورڈ (پی سی بی) نے بنگلادیش کے خلاف آئندہ ون ڈے سیریز کے لیے 15 رکنی قومی اسکواڈ کا اعلان کر دیا ہے، جس میں کئی حیران کن تبدیلیاں دیکھنے میں آئی ہیں۔ شاہین شاہ آفریدی ون ڈے ٹیم کے کپتان برقرار رہیں گے، تاہم سلیکشن کمیٹی نے بڑے فیصلے کرتے ہوئے سابق کپتان بابر اعظم، فخر زمان، صائم ایوب، حسیب اللہ اور حسن نواز کو اسکواڈ سے ڈراپ کر دیا ہے۔ 15 رکنی ٹیم میں نوجوان اور تجربہ کار کھلاڑیوں کا امتزاج رکھا گیا ہے جن میں عبدالصمد، ابرار احمد، فہیم اشرف، فیصل اکرم، حارث رؤف، حسین طلعت اور معاذ صداقت شامل ہیں۔ اس کے علاوہ محمد رضوان، محمد وسیم جونیئر، محمد غازی غوری، سعد مسعود، صاحبزادہ فرحان، سلمان علی آغا اور شمائل حسین کو بھی اسکواڈ کا حصہ بنایا گیا ہے۔ پاکستان اور بنگلادیش کے درمیان تین ون ڈے میچوں کی یہ سیریز 11 سے 15 مارچ تک ڈھاکا میں کھیلی جائے گی، جس کے لیے قومی ٹیم جلد روانہ ہوگی۔
