ترکیہ میں طیارہ حادثہ، لیبیا کے آرمی چیف سمیت 5 جاں بحق

ترکیہ کے دارالحکومت انقرہ میں ایسن بوغا ائیرپورٹ سے طرابلس جانے والا طیارہ تکنیکی خرابی کے باعث گر کر تباہ ہوگیا، جس میں لیبیا کے چیف آف اسٹاف جنرل محمد علی الحداد سمیت 5 افراد جاں بحق ہوئے۔ طیارہ اڑان بھرنے کے 30 منٹ بعد ائیر ٹریفک کنٹرول سے رابطہ منقطع ہوگیا، اور واپس انقرہ کی جانب روانہ ہونے کی کوشش کے دوران حادثے کا شکار ہوا۔

لیبیا کے وزیراعظم عبدالحمید الدبیبہ نے آرمی چیف کے جاں بحق ہونے کی تصدیق کی۔ رپورٹس کے مطابق جنرل الحداد ترکیہ کا دورہ مکمل کرکے واپس آرہے تھے، جہاں انہوں نے ترک وزیردفاع سے ملاقات کی تھی۔
حادثے کے بعد ترکیہ کی فضائی حدود عارضی طور پر بند کردی گئی اور سرچ اینڈ ریسکیو ٹیموں سمیت سکیورٹی اداروں کو ہائی الرٹ کردیا گیا۔ ترک وزیرداخلہ کے مطابق طیارہ شام 8:10 پر روانہ ہوا جبکہ 8:52 پر رابطہ منقطع ہوا، اور حیمانہ کے قریب ہنگامی لینڈنگ کے دوران دوبارہ رابطہ قائم نہ ہوسکا۔