اسلام آباد (نیوز ڈیسک) وزارتِ آئی ٹی اینڈ ٹیلی کمیونیکیشن نے بتایا ہے کہ وزیراعظم فیول ریلیف اسکیم کے تحت ملک بھر میں اب تک 10 لاکھ سے زائد مستحق شہریوں کی کامیاب رجسٹریشنز مکمل کی جا چکی ہیں۔ وزارتِ آئی ٹی کے مطابق اسکیم کی شفافیت اور بلا تعطل کارکردگی کو یقینی بنانے کے لیے 24 گھنٹے قائم خصوصی کنٹرول روم سے ملک بھر میں رئیل ٹائم مانیٹرنگ کا عمل جاری ہے۔ اس مانیٹرنگ سسٹم کے ذریعے پیٹرول پمپس اور شہریوں کی سہولت کاری کی مسلسل دیکھ بھال کی جا رہی ہے تاکہ اسکیم کے ثمرات نچلے طبقے تک بلا تاخیر پہنچ سکیں۔
وزارتِ آئی ٹی کی جانب سے مزید فراہم کردہ تفصیلی معلومات میں بتایا گیا ہے کہ اسکیم کے آغاز سے لے کر اب تک ملک بھر میں 8 لاکھ سے زائد فیول ٹوکنز جنریٹ کیے جا چکے ہیں۔ جاری کردہ اعداد و شمار کے مطابق ٹوکنز کے استعمال اور ریڈیمپشن کی فہرست میں صوبہ پنجاب اور وفاقی دارالحکومت اسلام آباد سب سے نمایاں اور آگے رہے ہیں۔ وزارت نے اطمینان کا اظہار کرتے ہوئے کہا کہ وزیراعظم ریلیف اسکیم سے ملک کے مستحق اور غریب لوگوں کو واقعی بڑا فائدہ پہنچ رہا ہے اور ان کا مالی بوجھ کم ہو رہا ہے۔
