وزیرِ اعلیٰ پنجاب مریم نواز نے لاہور میں ‘اپنا کھیت، اپنا روزگار’ اسکیم کے تحت 30 ہزار بے زمین اور مستحق خاندانوں کو قابلِ کاشت سرکاری اراضی کی الاٹمنٹ کے لیے کمپیوٹرائزڈ قرعہ اندازی کا افتتاح کر دیا ہے، جس کے تحت غریب کسانوں کو چار ایکڑ زرعی زمین محض 100 روپے سالانہ کی معمولی لیز پر دی جائے گی۔ اس انقلابی اسکیم کے تحت صوبے بھر میں مستحق خاندانوں کے درمیان مجموعی طور پر ایک لاکھ 21 ہزار ایکڑ اراضی تقسیم کی گئی ہے، جبکہ کسانوں کو کاشت کاری کے ابتدائی اخراجات سنبھالنے کے لیے حکومت کی جانب سے دو لاکھ روپے کی مالی امداد بھی فراہم کی جائے گی۔ وزیرِ اعلیٰ کا کہنا تھا کہ 22 اپریل کو شروع کی جانے والی اس اسکیم کے لیے 60 ہزار درخواستیں موصول ہوئی تھیں، جن میں 11 ہزار خواتین بھی شامل تھیں، اور اب تک 29 ہزار لاٹس کی قرعہ اندازی مکمل کر کے میرٹ پر شفاف الاٹمنٹ کی گئی ہے۔
مریم نواز نے تقریب سے خطاب کرتے ہوئے واضح کیا کہ اراضی کی تقسیم کے اس عمل میں کوئی سفارش یا سیاسی دباؤ قبول نہیں کیا گیا اور تمام الاٹمنٹ سو فیصد میرٹ پر کی گئی ہے تاکہ انتہائی غریب خاندانوں کو معاشی طور پر خود مختار بنا کر کسانوں کی عزتِ نفس بحال کی جا سکے۔ انہوں نے اعلان کیا کہ ایک ہفتے کے اندر کامیاب امیدواروں کو الاٹمنٹ لیٹر جاری کر دیے جائیں گے اور 31 جولائی تک اراضی کا باقاعدہ قبضہ بھی کسانوں کے حوالے کر دیا جائے گا۔ وزیرِ اعلیٰ پنجاب نے کسان دوست عزم کا اعادہ کرتے ہوئے مزید کہا کہ اس اسکیم کا بنیادی مقصد صوبے کی زرعی پیداوار میں اضافہ کرنا ہے اور پنجاب میں جہاں جہاں بھی قابلِ کاشت سرکاری زمین دستیاب ہوگی، اسے اسی طرح مرحلہ وار بے زمین اور مستحق خاندانوں میں تقسیم کیا جائے گا۔
