مونٹیری میں کھیلے گئے فیفا ورلڈ کپ 2026 کے ایک سنسنی خیز ناک آؤٹ مقابلے میں مراکش نے مضبوط حریف نیدرلینڈز کو پنالٹی شوٹ آؤٹ پر شکست دے کر پری کوارٹر فائنل میں جگہ بنا لی ہے۔ نیدرلینڈز اور مراکش کے درمیان یہ سنسنی خیز مقابلہ مقررہ اور اضافی وقت میں بھی ایک ایک گول سے برابر رہا تھا۔ کھیل کے مقررہ وقت میں نیدرلینڈز کی جانب سے کوڈی گیپکو نے گیند کو جال کی راہ دکھائی، جبکہ مراکش کی طرف سے شاندار کم بیک کرتے ہوئے ڈیوپ نے گول اسکور کر کے مقابلہ برابر کر دیا۔ میچ کا حتمی فیصلہ کرنے کے لیے دونوں ٹیموں کو پانچ، پانچ پنالٹی شوٹ آؤٹ دیے گئے، جس میں اعصاب پر قابو رکھتے ہوئے مراکش نے نیدرلینڈز کو 3-2 سے ہرا کر ایونٹ سے باہر کر دیا۔
اس شاندار فتح کے بعد اب پری کوارٹر فائنل راؤنڈ میں مراکش کا مقابلہ میزبان کینیڈا کی ٹیم سے 4 جولائی کو ہوگا۔ واضح رہے کہ جاری فیفا ورلڈ کپ کے راؤنڈ آف 32 میں یہ دوسرا بڑا میچ ہے جس کا فیصلہ پنالٹی شوٹ آؤٹ کے ذریعے ہوا ہے۔ اس سے قبل جرمنی اور پیراگوئے کے میچ کا فیصلہ بھی پنالٹی شوٹ آؤٹ پر ہوا تھا، جہاں پیراگوئے نے چار بار کی عالمی چیمپئن جرمن ٹیم کو سڈن ڈیتھ سیشن میں غیر متوقع شکست دے کر ٹورنامنٹ سے باہر کا راستہ دکھایا تھا۔
