ایرانی صدر ڈاکٹر مسعود پزشکیان نے اپنے اہم دورہِ پاکستان کے موقع پر صدرِ مملکت آصف علی زرداری اور وزیراعظم محمد شہباز شریف سے علیحدہ علیحدہ ملاقاتیں کی ہیں۔ ایوانِ صدر سے جاری اعلامیے کے مطابق، صدر آصف علی زرداری نے حالیہ علاقائی تنازع کے بعد پاکستان کا پہلا دورہ کرنے پر ایرانی صدر کا پُرتباک خیرمقدم کیا اور کہا کہ یہ دورہ دونوں ممالک کے خوشی و غم میں ساتھ کھڑے رہنے کے عزم کا مظہر ہے۔ ملاقات میں پاک ایران دوطرفہ تعلقات، علاقائی روابط، اقتصادی تعاون اور ایران کی خودمختاری و علاقائی سالمیت کے لیے پاکستان کی غیر مشروط حمایت کا اعادہ کیا گیا۔ صدر زرداری نے اسلام آباد مفاہمتی یادداشت پر دستخط ہونے پر ایرانی صدر کو مبارکباد دی اور واضح کیا کہ پاکستان نے ہمیشہ یکطرفہ اقدامات کی مخالفت کرتے ہوئے مذاکرات کی حمایت کی ہے۔
ملاقات کے دوران صدر آصف علی زرداری نے امتِ مسلمہ کے اتحاد اور خلیجی ممالک سے مضبوط برادرانہ تعلقات کی اہمیت پر زور دیا۔ انہوں نے ایک بار پھر آیت اللہ علی خامنہ ای کی شہادت پر گہرے رنج و غم کا اظہار کرتے ہوئے کہا کہ پاکستان ان کی نمازِ جنازہ میں شرکت کرے گا، جبکہ انہوں نے ایرانی سپریم لیڈر آیت اللہ سید مجتبیٰ خامنہ ای کے لیے نیک خواہشات کا اظہار بھی کیا۔ اس موقع پر ایرانی صدر ڈاکٹر مسعود پزشکیان نے امن کے فروغ کے لیے پاکستان کی مثبت کوششوں اور مشکل حالات میں یکجہتی کو سراہتے ہوئے کہا کہ ایران پاکستان کے ساتھ اپنے تعلقات کو انتہائی اہمیت دیتا ہے اور دونوں ممالک سیاسی، اقتصادی، سکیورٹی اور علاقائی امور میں تعاون کو مزید وسعت دیں گے۔
دوسری جانب، وزیراعظم ہاؤس میں وزیراعظم شہباز شریف سے بھی ایرانی صدر مسعود پزشکیان کی اہم ملاقات ہوئی۔ اعلامیے کے مطابق اس ملاقات میں نائب وزیراعظم و وزیر خارجہ اسحاق ڈار اور آرمی چیف فیلڈ مارشل عاصم منیر بھی موجود تھے۔ ملاقات میں دونوں ممالک کے درمیان وفود کی سطح پر مذاکرات اور مستقبل کی اسٹریٹجک پارٹنرشپ کو مزید مضبوط بنانے کے عزم کا اظہار کیا گیا۔
