کھاریاں کی شیراز کالونی جنڈانوالہ، مسجد بلال سٹریٹ میں گیپکو انتظامیہ کی شدید لاپرواہی اور بے حسی کے باعث اہل علاقہ گزشتہ روز دوپہر دو بجے سے بجلی کی نعمت سے محروم ہیں۔ مقامی ٹرانسفارمر کی ڈی فیوز اڑنے کی وجہ سے پیدا ہونے والے اس تعطل پر شہریوں نے متعدد بار ایس ڈی او گیپکو کھاریاں اور متعلقہ عملے سے رابطہ کرنے کی کوشش کی، لیکن افسوسناک امر یہ ہے کہ سرکاری افسران نے عوامی کالز کا جواب دینا بھی گوارا نہیں کیا۔ حد تو یہ ہے کہ جب مجبور شہریوں نے آفیشل ہیلپ لائن 118 پر باقاعدہ شکایت درج کروائی، تو انہیں گیپکو کی جانب سے یہ جھوٹا پیغام موصول ہوا کہ ان کا مسئلہ حل کر دیا گیا ہے، جبکہ حقیقت میں اب تک نہ تو بجلی بحال ہوئی ہے اور نہ ہی ٹرانسفارمر کی مرمت کے لیے کوئی عملہ جائے وقوعہ پر پہنچا ہے۔
شدید گرمی کے اس لرزہ خیز موسم میں مسلسل 20 گھنٹوں سے زائد کا وقت گزرنے کے باوجود بجلی کی عدم دستیابی نے بچوں، بزرگوں، مریضوں اور عام شہریوں کی زندگی کو اجیرن بنا کر رکھ دیا ہے۔ فدیان مرزا اور اہل علاقہ نے اس سنگین صورتحال پر گہرے دکھ اور غصے کا اظہار کرتے ہوئے سوال اٹھایا ہے کہ اگر عوامی شکایات کو سنے اور حل کیے بغیر ہی کاغذی کارروائی میں "Resolved” یعنی حل شدہ قرار دے دیا جائے گا، تو غریب عوام اپنی داد رسی کے لیے کس کا دروازہ کھٹکھٹائیں۔ متاثرین نے اعلیٰ حکام سے پرزور مطالبہ کیا ہے کہ فی الفور ٹرانسفارمر کی مرمت کر کے بجلی بحال کی جائے، شکایت کو غلط طور پر حل شدہ ظاہر کرنے کی اعلیٰ سطحی تحقیقات کروائی جائیں اور عوامی مشکلات پر عدم توجہی کا مظاہرہ کرنے والے ذمہ دار افسران و اہلکاروں کے خلاف سخت قانونی کارروائی عمل میں لائی جائے۔
