وادی تیرہ: وزیراعلیٰ خیبر پختونخوا سہیل آفریدی عیدالاضحیٰ کے پرمسرت موقع پر اپنے آبائی علاقے وادی تیرہ پہنچ گئے، تاہم ان کا یہ دورہ عوامی احتجاج سے بھی متاثر رہا۔
جیسے ہی وزیراعلیٰ اپنے آبائی گھر پہنچے، مقامی افراد کی بڑی تعداد وہاں جمع ہوگئی اور احتجاجی مظاہرہ کیا۔ مظاہرین نے شدید نعرے بازی کرتے ہوئے موقف اختیار کیا کہ وزیراعلیٰ اور انتظامیہ کی جانب سے ان سے کیے گئے وعدے تاحال ایفا نہیں ہو سکے، جس کے باعث علاقہ مکینوں میں شدید بے چینی پائی جاتی ہے۔ مظاہرین نے مطالبات کی فوری منظوری کے لیے نعرے لگائے۔
دوسری جانب، احتجاج کے باوجود وزیراعلیٰ سہیل آفریدی نے اپنی سیاسی اور عوامی مصروفیات جاری رکھیں۔ اس موقع پر علاقائی عمائدین، پارٹی کارکنوں اور شہریوں کے وفود نے ان سے ملاقاتیں کیں اور انہیں اپنے مسائل سے آگاہ کیا۔
وزیراعلیٰ خیبر پختونخوا نے عوامی شکایات کا نوٹس لیتے ہوئے متعلقہ حکام کو عوامی مسائل کے فوری حل کے لیے ہدایات جاری کیں۔ انہوں نے اس عزم کا اعادہ کیا کہ عوامی مشکلات کا ازالہ کرنا ان کی اولین ترجیح ہے اور تمام وعدوں کو جلد از جلد عملی جامہ پہنایا جائے گا۔
