ایرانی صدر مسعود پزشکیان اور امیرِ قطر شیخ تمیم بن حمد الثانی کے درمیان اہم ٹیلیفونک رابطہ ہوا ہے، جس میں علاقائی صورتحال اور جنگ کے خاتمے کے لیے سفارتی کوششوں پر تبادلہ خیال کیا گیا۔ ایرانی صدر نے اس عزم کا اعادہ کیا کہ تہران خطے میں پائیدار اور باوقار جنگ بندی کے حصول کے لیے ہر ممکن تعاون کو تیار ہے۔ انہوں نے زور دیا کہ ایران مذاکرات کے ذریعے تنازعات کے حل کے اپنے اخلاص کو ثابت کر چکا ہے، اور اب وقت آ گیا ہے کہ دوسرا فریق بھی امن کے لیے اپنی سنجیدگی اور آمادگی کا عملی مظاہرہ کرے۔
ملاقات کے دوران ایرانی صدر نے ایک الگ پیغام میں واضح کیا کہ ایران اسلامی ممالک کی جانب برادرانہ دوستی کا ہاتھ بڑھانے کا خواہاں ہے، تاہم قومی خود مختاری اور سلامتی کے تحفظ کے معاملے پر کوئی سمجھوتہ نہیں کیا جائے گا۔ ایران اپنی خودمختاری کے دفاع میں کسی بھی قسم کی ہچکچاہٹ کا مظاہرہ نہیں کرے گا۔ یہ بیان خطے میں بڑھتی ہوئی کشیدگی اور ایران کی خارجہ پالیسی کے اہم نکات کو اجاگر کرتا ہے۔
دوسری جانب، امیرِ قطر شیخ تمیم بن حمد الثانی نے ایران کے معاملے پر ثالثی کے اپنے کردار کو جاری رکھنے کا اعلان کیا ہے۔ انہوں نے کہا کہ قطر خطے میں قیامِ امن اور کشیدگی کو کم کرنے کے لیے تعمیری سفارت کاری جاری رکھے گا، تاکہ باہمی مسائل کا حل بات چیت کے ذریعے ممکن بنایا جا سکے۔ دونوں رہنماؤں کا یہ رابطہ ایسے وقت میں ہوا ہے جب خطے میں سفارتی کوششوں کی اہمیت انتہائی بڑھ چکی ہے۔
