کھاریاں (قاری نصیر احمد کلیار)ڈی پی او گجرات کی خصوصی ہدایت پر گجرات پولیس کھاریاں سرکل نے منشیات فروشوں کے خلاف گھیرا تنگ کرتے ہوئے بڑی کارروائیاں عمل میں لائی ہیں، جس کے نتیجے میں بھاری مقدار میں چرس اور شراب برآمد کر کے 3 ملزمان کو گرفتار کر لیا گیا ہے۔ پہلی کارروائی میں ایس ایچ او تھانہ گلیانہ نے اپنی پولیس ٹیم معہ محمد اکرم شاہ (SI) اور محمد عمران (ASI) کے ہمراہ منشیات کے اڈوں پر چھاپہ مار کر دو منشیات فروشوں کو دھر لیا۔ گرفتار ملزمان میں عدیل ولد ناصر مسیح (ساکن نصیرہ) اور محمد عثمان ولد محمد الطاف (ساکن لہڑی) شامل ہیں، جن کے قبضے سے بالترتیب 10، 10 لیٹر (مجموعی طور پر 20 لیٹر) شراب برآمد کی گئی۔
دوسری کارروائی میں تھانہ ککرالی کے ایس ایچ او نے اپنی پولیس ٹیم اور اکمل رفیق (ASI) کے ہمراہ مخبر کی اطلاع پر ناجائز کارروائی کرتے ہوئے ایک اور بڑے منشیات فروش کو گرفتار کیا۔ پولیس ٹیم نے ملزم شاہزیب ولد یامین (ساکن جگو شرقی) کو گرفتار کر کے اس کے قبضے سے 1 کلو گرام سے زائد (مجموعی طور پر 1045 گرام) اعلیٰ معیار کی چرس برآمد کر لی۔ ترجمان گجرات پولیس کے مطابق کھاریاں سرکل کے دونوں تھانوں میں گرفتار ملزمان کے خلاف منشیات فروشی کے الگ الگ مقدمات درج کر کے قانونی کارروائی کا آغاز کر دیا گیا ہے۔
