پاکستان ویمنز کرکٹ ٹیم کی کپتان فاطمہ ثناء کا ورلڈ ریکارڈ؛ 15 گیندوں پر نصف سنچری اسکور کرنے کا اعزاز اپنے نام کر لیا

پاکستان ویمنز کرکٹ ٹیم کی کپتان فاطمہ ثناء نے شاندار اور جارحانہ بیٹنگ کا مظاہرہ کرتے ہوئے ویمنز ٹی ٹوئنٹی انٹرنیشنل کرکٹ کی تاریخ کا نیا ورلڈ ریکارڈ قائم کر دیا ہے۔ کراچی کے نیشنل بینک سٹیڈیم میں زمبابوے کے خلاف کھیلے گئے تیسرے اور آخری ٹی ٹوئنٹی میچ میں فاطمہ ثناء نے محض 15 گیندوں پر طوفانی نصف سنچری بنا کر دنیا کی تیز ترین ففٹی اسکور کرنے کا اعزاز اپنے نام کیا۔ اس سے قبل یہ عالمی ریکارڈ نیوزی لینڈ کی صوفی ڈیوائن، آسٹریلیا کی فوبی لِچ فیلڈ اور بھارت کی رِچا گھوش کے پاس تھا جنہوں نے 18، 18 گیندوں پر نصف سنچریاں اسکور کی تھیں۔ فاطمہ ثناء مجموعی طور پر 19 گیندوں پر 10 چوکوں اور 2 چھکوں کی مدد سے 62 رنز بنا کر ناقابلِ شکست رہیں۔

میچ میں پاکستان ویمنز ٹیم نے ٹاس جیت کر پہلے بیٹنگ کرتے ہوئے مقررہ 20 اوورز میں 4 وکٹوں کے نقصان پر 223 رنز کا پہاڑ جیسا مجموعہ کھڑا کیا۔ کپتان فاطمہ ثناء کے علاوہ مڈل آرڈر بیٹر سائرہ جبین نے 50 اور عائشہ ظفر نے 45 رنز کی عمدہ اننگز کھیل کر ٹیم کی پوزیشن کو مضبوط کیا۔ 224 رنز کے بڑے ہدف کے تعاقب میں زمبابوے کی پوری ٹیم پاکستانی بولرز کے سامنے بے بس نظر آئی اور 18ویں اوور میں محض 90 رنز بنا کر آؤٹ ہو گئی۔ یوں پاکستان نے یہ میچ 133 رنز کے بھاری مارجن سے جیت کر تین میچوں کی سیریز میں 0-3 سے شاندار کلین سوئپ مکمل کر لیا۔