پاکستان اور بنگلادیش کے درمیان کھیلے جا رہے ڈھاکا ٹیسٹ کے تیسرے روز پاکستانی ٹیم اپنی پہلی اننگز میں 386 رنز بنا کر آؤٹ ہوگئی، جس کے بعد بنگلادیش نے دن کے اختتام تک بغیر کسی نقصان کے 7 رنز بنا کر مجموعی طور پر 34 رنز کی برتری حاصل کر لی ہے۔ آج قومی ٹیم نے اپنی پہلی نامکمل اننگز کا آغاز 179 رنز ایک کھلاڑی آؤٹ سے کیا تو اپنا پہلا ٹیسٹ کھیلنے والے نوجوان بیٹر اذان اویس نے بہترین کھیل کا مظاہرہ کرتے ہوئے اپنی پہلی سنچری مکمل کی، وہ 103 رنز بنا کر نمایاں رہے۔ دیگر بیٹرز میں عبداللہ فضل 60، محمد رضوان 59، سلمان علی آغا 58 اور امام الحق 45 رنز بنا کر نمایاں رہے، جبکہ کپتان شان مسعود 9 اور سعود شکیل صفر پر پویلین لوٹ گئے۔ شاہین شاہ آفریدی نے 13 رنز کا اضافہ کیا۔
بنگلادیش کی جانب سے مہدی حسن میراز نے تباہ کن بولنگ کرتے ہوئے 5 وکٹیں حاصل کیں، جبکہ تسکین احمد اور تیج الاسلام نے دو دو کھلاڑیوں کو آؤٹ کیا۔ اس سے قبل بنگلادیش نے اپنی پہلی اننگز میں 413 رنز اسکور کیے تھے جس میں نجم الحسن شانتو کی سنچری اور مومن الحق کے 91 رنز شامل تھے۔ پاکستان کی طرف سے پہلی اننگز میں محمد عباس نے 5 اور شاہین آفریدی نے 3 وکٹیں حاصل کی تھیں۔ کھیل کے تیسرے روز کے اختتام پر بنگلادیشی اوپنرز نے محتاط انداز اپنایا اور بغیر کسی وکٹ کے نقصان کے 7 رنز بنا لیے ہیں، یوں میچ اب ایک دلچسپ مرحلے میں داخل ہو گیا ہے جہاں ہوم ٹیم کو مجموعی طور پر 34 رنز کی سبقت حاصل ہے۔
