کراچی: پشاور زلمی کے کپتان بابر اعظم نے پاکستان سپر لیگ (پی ایس ایل) کی تاریخ میں ایک اور سنگِ میل عبور کرتے ہوئے ایک ہی سیزن میں سب سے زیادہ رنز بنانے کا ریکارڈ برابر کر دیا ہے۔ منگل کے روز اسلام آباد یونائیٹڈ کے خلاف کوالیفائر میچ میں بابر اعظم نے 59 گیندوں پر 103 رنز کی جارحانہ اننگز کھیلی، جس کی بدولت انہوں نے جاری سیزن 2026 میں اب تک 588 رنز مکمل کر لیے ہیں۔
اس شاندار کارکردگی کے ساتھ ہی بابر اعظم نے فخر زمان کا وہ ریکارڈ برابر کر دیا ہے جو انہوں نے 2022 کے سیزن میں 13 اننگز کھیل کر 588 رنز بنا کر قائم کیا تھا۔ دلچسپ بات یہ ہے کہ بابر اعظم نے یہ ہدف صرف 10 اننگز میں حاصل کر لیا ہے۔ اب بابر اعظم کے پاس فخر زمان کا ریکارڈ توڑ کر نئی تاریخ رقم کرنے کے لیے فائنل کا معرکہ باقی ہے، جہاں وہ ایک بار پھر میدان میں اتریں گے۔
