اقوامِ متحدہ نے امریکا اور ایران کے درمیان بڑھتی کشیدگی پر شدید تشویش کا اظہار کیا ہے اور دونوں ممالک سے تنازعات کے حل کے لیے سفارت کاری کی اپیل کی ہے۔ اقوامِ متحدہ کے سیکرٹری جنرل انتونیو گوتریس کے ترجمان نے کہا کہ مشرقِ وسطیٰ میں بڑھتی ہوئی فوجی نقل و حرکت، جنگی مشقوں اور بحری موجودگی پر گہری تشویش ہے۔
گزشتہ روز ایران نے اقوامِ متحدہ کو ایک خط ارسال کیا تھا جس میں خبردار کیا گیا تھا کہ کسی بھی جارحیت کی صورت میں ایران اپنے دفاع کا حق استعمال کرے گا اور اس کے نتائج کی ذمے داری امریکا پر ہوگی۔
امریکا اور ایران کے درمیان کشیدگی میں اضافہ ہو رہا ہے، جس کے بعد دونوں ملکوں کے درمیان جنگ کے خدشات بڑھ گئے ہیں۔ رپورٹوں کے مطابق، امریکا کا دوسرا بحرہ بیڑا "جیرالڈ فورڈ” لڑاکا طیاروں کے ساتھ بحیرہ روم میں داخل ہو چکا ہے جبکہ پرتگال میں امریکی فضائی اڈوں پر لڑاکا طیارے پوزیشن سنبھال چکے ہیں۔
برطانوی خبر ایجنسی کا دعویٰ ہے کہ اگر ایران پر حملہ کیا گیا تو امریکا ایرانی رہنماؤں کو براہ راست نشانہ بنائے گا اور امریکی فوج ایرانی حکومت کا تختہ الٹنے کی کوشش کرے گی۔
