پنجاب حکومت نے صوبے میں ماحول دوست ٹرانسپورٹ کے فروغ کے لیے اہم اقدام کرتے ہوئے سرکاری محکموں میں پیٹرول اور ڈیزل سے چلنے والی گاڑیوں کی خریداری پر پابندی لگانے کا فیصلہ کر لیا ہے۔چیف سیکرٹری پنجاب کے مطابق آئندہ سرکاری محکمے صرف الیکٹرک یا ہائبرڈ گاڑیاں خرید سکیں گے، تاہم فیلڈ ڈیوٹی میں استعمال ہونے والی گاڑیوں کو اس فیصلے سے استثنیٰ حاصل ہوگا۔چیف سیکرٹری نے مزید بتایا کہ صوبے میں نئے پیٹرول پمپس کے لیے این او سی کا اجرا اب الیکٹرک چارجنگ یونٹ کی تنصیب سے مشروط ہوگا، جبکہ الیکٹرک چارجنگ سہولت کے بغیر کسی نئے پیٹرول پمپ کو کام کی اجازت نہیں دی جائے گی۔انہوں نے کہا کہ ماحولیاتی تحفظ کے لیے گرین انرجی کا فروغ حکومت کی ترجیح ہے اور اس مقصد کے تحت صوبے میں نئی الیکٹرک وہیکل پالیسی جلد متعارف کروائی جائے گی۔چیف سیکرٹری کے مطابق این او سی حاصل کرنے والے 170 نئے پیٹرول پمپس پر الیکٹرک چارجنگ یونٹس کی تنصیب لازمی قرار دی گئی ہے، جبکہ پنجاب کے 31 شہروں میں ان پمپس کے لیے ای بز پورٹل کے ذریعے این او سیز جاری کی جا چکی ہیں۔
