تحریک انصاف کے چیئرمین بیرسٹر گوہر نے کہا ہے کہ پنجاب میں حالیہ ضمنی انتخابات میں ٹرن آؤٹ تاریخ کی کم ترین سطح پر رہا، جس سے ظاہر ہوتا ہے کہ عوام نے الیکشن پر عدم اعتماد کا اظہار کیا ہے۔
بیرسٹر گوہر نے کہا کہ الیکشن کا صاف اور شفاف انعقاد الیکشن کمیشن کی ذمہ داری ہے۔ انہوں نے کہا کہ تحریک انصاف جمہوریت پر یقین رکھتی ہے اور موجودہ نمبرز کے مطابق پارٹی پنجاب میں لیڈ کر رہی ہے۔
بیرسٹر گوہر نے واضح کیا کہ پی ٹی آئی دھاندلی کے بجائے عوامی سیاست پر یقین رکھتی ہے، اور یہ انتخابات ایک ویک اپ کال ہیں۔ انہوں نے بتایا کہ ہری پور میں تمام سیاسی جماعتوں کو جلسے، جلوس اور مہم چلانے کی اجازت تھی، اور وہاں پی ٹی آئی کے امیدوار مضبوط مارجن سے آگے ہیں، تاہم پنجاب کے دیگر حصوں میں پارٹی کے جلسوں اور مہمات کو محدود کیا گیا۔
چیئرمین پی ٹی آئی نے دعویٰ کیا کہ این اے 18 ہری پور میں جو نتائج دکھائے جا رہے ہیں وہ حقیقت پر مبنی نہیں ہیں۔ این اے 18 کے ضمنی انتخاب میں پی ٹی آئی کی حمایت یافتہ آزاد امیدوار شہرناز عمر ایوب، مسلم لیگ ن کے بابر نواز خان اور پیپلز پارٹی کی ارم فاطمہ سمیت چھ آزاد امیدوار حصہ لے رہے ہیں۔
بیرسٹر گوہر نے کہا کہ عوامی عدم اعتماد اور کم ٹرن آؤٹ مستقبل کے سیاسی منظرنامے کے لیے اہم پیغام ہے۔
