جہلم (محمد زاہد خورشید) ضلع جہلم نے کارکردگی کی درجہ بندی میں نمایاں اور شاندار بہتری دکھاتے ہوئے 18ویں پوزیشن سے ترقی کر کے پنجاب بھر میں پہلی پوزیشن حاصل کرنے کا اعزاز اپنے نام کر لیا ہے۔ اس اہم اور تاریخی کامیابی پر ڈپٹی کمشنر جہلم میر رضا اوزگن نے ضلعی انتظامیہ کے تمام افسران اور فیلڈ عملے کو دل کی گہرائیوں سے مبارکباد پیش کی، اور ان کی مسلسل محنت، لگن، پیشہ ورانہ وابستگی اور بہترین ٹیم ورک کو خصوصی طور پر سراہا۔
اس موقع پر اپنے خیالات کا اظہار کرتے ہوئے ڈپٹی کمشنر نے اس بات پر زور دیا کہ یہ شاندار کامیابی دراصل پوری ٹیم کی مشترکہ محنت اور خلوصِ نیت کا منہ بولتا ثبوت ہے۔ انہوں نے مستقبل میں بھی اسی بلند جذبے اور عزمِ صمیم کے ساتھ عوامی خدمت کا سلسلہ جاری رکھنے اور اپنی کارکردگی کا یہ تسلسل برقرار رکھنے کی سخت ہدایت کی۔
