امریکی میڈیا نے دعویٰ کیا ہے کہ امریکا اور ایران کے درمیان کشیدگی کو کم کرنے کے لیے مذاکرات کا نیا دور آئندہ ہفتے سوئٹزرلینڈ میں متوقع ہے۔ دونوں ممالک کے درمیان جاری تناؤ میں کمی لانے کے لیے عالمی ثالث اس وقت انتہائی متحرک دکھائی دے رہے ہیں، جس کے نتیجے میں دو روز سے جاری حملوں کا سلسلہ بھی تھم گیا ہے۔ ان وسیع سفارتی کوششوں کا مقصد خطے کی صورتحال کو پرامن بنانا ہے۔
ذرائع کے مطابق قطر، پاکستان، مصر اور سعودی عرب کے حکام نے بدھ کے روز امریکی اور ایرانی حکام سے ٹیلیفونک رابطے کیے ہیں تاکہ تکنیکی ٹیموں کے درمیان مذاکرات کے اگلے دور کی حتمی تاریخیں مقرر کی جا سکیں۔ ثالثی کے عمل میں شریک ذرائع کا کہنا ہے کہ اس وقت تمام تر توجہ دونوں ممالک کے درمیان براہ راست تناؤ کو کم کرنے پر مرکوز ہے تاکہ مستقبل کے سفارتی عمل کو کامیابی سے آگے بڑھایا جا سکے۔
