آزاد جموں و کشمیر کے انسپکٹر جنرل (آئی جی) پولیس لیاقت علی ملک نے مظفر آباد میں ایک ہنگامی پریس کانفرنس سے خطاب کرتے ہوئے کہا ہے کہ شرپسند عناصر کشمیر کی موجودہ صورتِ حال سے متعلق دانستہ طور پر جھوٹا پروپیگنڈا پھیلانے میں مصروف ہیں۔ انہوں نے سنسنی خیز انکشاف کیا کہ اس مہم جوئی کے لیے جدید ترین ٹیکنالوجی اور مصنوعی ذہانت (AI) کا بڑے پیمانے پر استعمال کیا جا رہا ہے تاکہ روز نئے اور من گھڑت بیانیے تیار کر کے عوام کو گمراہ کیا جا سکے۔
آئی جی لیاقت علی ملک نے ایک غیر ملکی نشریاتی ادارے کی حالیہ رپورٹ کو یکسر مسترد کرتے ہوئے اسے مضحکہ خیز، بے بنیاد اور حقائق کے سراسر منافی قرار دیا، جس میں سیکیورٹی اداروں پر خوراک سے بھری گاڑی روکنے کا الزام لگایا گیا تھا۔ انہوں نے اصل حقائق سامنے لاتے ہوئے واضح کیا کہ ایک کالعدم تنظیم کے ارکان خود راستے بند کرنے، خوراک لے جانے والی گاڑیوں کو لوٹنے اور معصوم ڈرائیوروں پر بدترین تشدد کرنے میں ملوث ہیں۔ آئی جی نے دوٹوک الفاظ میں کہا کہ آزاد کشمیر پولیس عوام کی جان و مال کے تحفظ کا فریضہ بخوبی انجام دے رہی ہے اور راولا کوٹ کے چند حساس مقامات کے سوا ریاست کے تمام اہم راستے اور شاہراہیں آمد و رفت کے لیے مکمل کھلی ہیں۔
