فیفا فٹبال ورلڈکپ کے گروپ ایچ (H) کے ایک اہم میچ میں سابق عالمی چیمپئن اسپین نے سعودی عرب کو چار صفر سے عبرتناک شکست دے کر ایونٹ میں اپنی طاقت کا لوہا منوا لیا ہے۔ امریکی شہر اٹلانٹا میں کھیلے گئے اس یکطرفہ میچ کے آغاز سے ہی اسپین نے حریف ٹیم پر اپنا دباؤ برقرار رکھا۔ میچ کے دسویں ہی منٹ میں اسٹار کھلاڑی لامین یمال نے شاندار گول اسکور کر کے اسپین کو ایک صفر کی ابتدائی برتری دلا دی۔
سعودی عرب ابھی اس ابتدائی نقصان سے سنبھل بھی نہ پایا تھا کہ پہلے گول میں معاونت (اسسٹ) کرنے والے میکال اورزابال نے گیند کو جال کی راہ دکھا کر اسکور دو صفر کر دیا۔ اس گول کے محض تین منٹ بعد ہی میکال اورزابال نے ایک بار پھر دانی اولمو کے پاس پر شاندار کارکردگی دکھاتے ہوئے اپنا دوسرا اور ٹیم کا تیسرا گول داغ دیا۔ پہلے ہاف کے اختتام پر اسپین کو میچ پر تین صفر کی مضبوط برتری حاصل تھی۔
دوسرے ہاف کے آغاز میں سعودی عرب کی مشکلات میں اس وقت مزید اضافہ ہو گیا جب مدافع حسن الطامبکتی نے دباؤ میں آکر گیند کو اپنے ہی گول میں پہنچا دیا، جس کے نتیجے میں یہ ‘اون گول’ اسپین کے حق میں چوتھا گول بن گیا۔ میچ کے آخری لمحات میں اسپین نے ایک اور گول بھی اسکور کیا، تاہم ریفری نے ویڈیو اسسٹنٹ ریفری (VAR) کی مدد سے اسے آف سائیڈ قرار دے کر مسترد کر دیا۔ یوں یہ میچ اسپین کی چار صفر کی شاندار اور یکطرفہ جیت کے ساتھ ختم ہوا۔
