بے نظیر انکم سپورٹ پروگرام (BISP) کے دائرہ کار کو وسیع کرتے ہوئے ایک اہم پیش رفت سامنے آئی ہے۔ پبلک اکاؤنٹس کمیٹی (PAC) کی ذیلی کمیٹی کے اجلاس کے دوران یہ فیصلہ کیا گیا ہے کہ اب 35 سال سے زائد عمر کی غیر شادی شدہ خواتین کو بھی اس امدادی پروگرام کا حصہ بنایا جائے گا۔ کمیٹی رکن بلال مندوخیل نے اس ضرورت پر زور دیا کہ معاشرے میں وہ غیر شادی شدہ خواتین جن کا کوئی سہارا نہیں، وہ سب سے زیادہ حکومتی تعاون اور مالی امداد کی حقدار ہیں۔ بی آئی ایس پی حکام نے اس تجویز کو خوش آئند قرار دیتے ہوئے تصدیق کی ہے کہ ان خواتین کو رجسٹر کرنے کا عمل شروع کیا جا رہا ہے تاکہ انہیں باوقار طریقے سے مالی معاونت فراہم کی جا سکے۔
