ایرانی پارلیمنٹ کے اسپیکر محمد باقر قالیباف نے لبنان میں جنگ بندی کے عمل میں پاکستان کے مثبت اور فعال سفارتی کردار کو سراہتے ہوئے ریاست پاکستان اور فیلڈ مارشل عاصم منیر کا شکریہ ادا کیا ہے۔ سوشل میڈیا پر جاری اپنے ایک بیان میں باقر قالیباف نے لبنان جنگ بندی کو حزب اللہ کی ثابت قدمی، شجاعت اور اتحاد کا نتیجہ قرار دیا ہے۔
انہوں نے واضح کیا کہ ایران اس جنگ بندی کو احتیاط کے ساتھ ڈیل کرے گا اور حتمی و مکمل کامیابی کے حصول تک اس عمل کو محتاط انداز میں آگے بڑھایا جائے گا۔ ایرانی اسپیکر نے فیلڈ مارشل عاصم منیر کی ثالثی کی کوششوں کی تعریف کرتے ہوئے اس بات پر زور دیا کہ ایران اپنے اصولی موقف اور عہد پر سختی سے قائم ہے اور کسی صورت اپنے پیچھے نہیں ہٹے گا۔ ان کا مزید کہنا تھا کہ تمام تر چیلنجز کے باوجود ایران اور اس کے اتحادی مکمل فتح تک ایک ساتھ کھڑے رہیں گے۔
