عمران خان کی متاثرہ آنکھ کا اڈیالہ جیل میں دوبارہ تفصیلی طبی معائنہ کیا گیا جہاں پانچ رکنی میڈیکل بورڈ نے دو گھنٹے تک ان کی آنکھ کا فالو اپ چیک اپ کیا۔ ذرائع کے مطابق معائنے کے دوران ان کی اہلیہ بشریٰ بی بی بھی موجود تھیں جبکہ جدید طبی آلات اور سرکاری ایمبولینس کے ساتھ ماہرین امراض چشم کی ٹیم جیل پہنچی۔
رپورٹس کے مطابق اس سے قبل عمران خان کی آنکھ کا علاج پمز اسپتال میں دو مرتبہ کیا جا چکا ہے اور اب انہیں تیسرا انجیکشن لگایا جانا متوقع ہے، جس سے پہلے ڈاکٹرز آنکھ کی بہتری کا مکمل جائزہ لے رہے ہیں۔
یہ میڈیکل بورڈ اسلام آباد ہائی کورٹ کے حکم پر تشکیل دیا گیا ہے، جس نے چیف کمشنر کو ہدایت کی تھی کہ بانی پی ٹی آئی کے علاج کے لیے مکمل انتظام کیا جائے۔ میڈیکل ٹیم اپنی رپورٹ جلد پیش کرے گی جس کے بعد آئندہ علاج کا فیصلہ کیا جائے گا۔
دوسری جانب وفاقی وزیر عطا تارڑ نے کہا ہے کہ عید کے موقع پر عمران خان کی اپنے بچوں سے فون پر بات کروائی جائے گی اور ان کے بچوں کو پاکستان آنے کے لیے ویزے کی ضرورت نہیں ہوگی، تاہم انہیں ملکی قوانین پر عمل کرنا ہوگا۔
