پاکستان تحریکِ انصاف (پی ٹی آئی) کی سیاسی کمیٹی نے حکومت کی جانب سے بلائے گئے مشاورتی اجلاس میں شرکت کے لیے کڑی شرط رکھ دی ہے۔ اعلامیے کے مطابق تحریکِ انصاف کا کہنا ہے کہ جب تک بانی پی ٹی آئی عمران خان سے ملاقات نہیں کرائی جاتی، وہ کسی بھی حکومتی اجلاس کا حصہ نہیں بنیں گے۔ پی ٹی آئی نے مطالبہ کیا ہے کہ عمران خان کو فوری طور پر شفا انٹرنیشنل ہسپتال منتقل کیا جائے اور ان کا علاج ذاتی معالجین اور فیملی کی موجودگی میں یقینی بنایا جائے۔ سیاسی کمیٹی نے عدلیہ کے احکامات کی بالادستی اور بانی پی ٹی آئی کے تمام آئینی حقوق کی فراہمی کا بھی مطالبہ کیا ہے۔ اعلامیے میں افغانستان کے ساتھ کشیدہ صورتحال پر تشویش اور ایران پر امریکہ و اسرائیل کی حالیہ جارحیت کی شدید مذمت کرتے ہوئے اسے دنیا کو مزید افراتفری کی طرف دھکیلنے کے مترادف قرار دیا گیا ہے۔ یاد رہے کہ وزیراعظم شہباز شریف نے مشرقِ وسطیٰ کی صورتحال اور خارجہ پالیسی پر اعتماد میں لینے کے لیے کل اپوزیشن اور پارلیمانی لیڈرز کو وزیراعظم ہاؤس مدعو کر رکھا ہے، تاہم پی ٹی آئی نے اپنی شرکت کو بانی سے ملاقات سے مشروط کر دیا ہے۔
