فیفا ورلڈ کپ 2026ء کے فائنل میچ نے قیمتوں کے تمام پچھلے ریکارڈ توڑ دیے ہیں اور یہ امریکی کھیلوں کی تاریخ کا مہنگا ترین مقابلہ بن گیا ہے۔ فوربز کی رپورٹ کے مطابق، فائنل میچ کے ٹکٹ کی کم از کم قیمت 6 ہزار 943 ڈالرز ہے، جبکہ اوسط قیمت 11 ہزار 327 ڈالرز تک جا پہنچی ہے۔ اس سے قبل 2024ء کا سپر باؤل 9 ہزار 411 ڈالرز اوسط قیمت کے ساتھ یہ اعزاز اپنے نام کیے ہوئے تھا۔ نیو جرسی کے میٹ لائف اسٹیڈیم میں پریمیم نشستوں کی قیمتیں تو 28 ہزار ڈالرز سے بھی تجاوز کر گئی ہیں۔
دوسری جانب، ارجنٹینا کے کپتان لیونل میسی نے اسپین کے نوجوان اسٹار لامین یامال کے ساتھ اپنی 2007ء کی وائرل تصویر پر ردِعمل دیتے ہوئے اسے زندگی کا ایک حیران کن اتفاق قرار دیا ہے۔ میسی نے یامال کی صلاحیتوں کا اعتراف کرتے ہوئے انہیں دنیا کے بہترین کھلاڑیوں میں شمار کیا اور ان کے شاندار مستقبل کے لیے نیک خواہشات کا اظہار کیا ہے۔ یہ تاریخی تصویر رواں سال یورپی چیمپئن شپ کے دوران یامال کے والد کی جانب سے سوشل میڈیا پر شیئر کیے جانے کے بعد دوبارہ سرخیوں میں آئی تھی۔
