بھارت کی ریاست اترپردیش کے شہر بلند شہر میں ایک عجیب و غریب واقعہ پیش آیا جہاں ایک بندر وکیل کے ہاتھوں سے نقدی سے بھرا بیگ چھین کر درخت پر چڑھ گیا اور پیسے ہوا میں اڑا دیے۔
بھارتی میڈیا کے مطابق کچہری روڈ پر ایک وکیل اپنے ساتھیوں کے ہمراہ جائیداد کی رجسٹری کے لیے جا رہا تھا کہ اچانک ایک بندر نے حملہ کر کے اس کے ہاتھ سے بیگ چھین لیا۔ بیگ میں 2 لاکھ روپے کی خطیر رقم موجود تھی۔ بندر درخت کی اونچی شاخ پر جا بیٹھا اور بیگ کھول کر نوٹ نیچے گرانا شروع کر دیے، جس سے وہاں موجود وکلاء، سائلین اور راہگیروں میں کھلبلی مچ گئی۔
درخت کے نیچے کھڑے لوگوں نے ہوا میں اڑتے نوٹ جمع کرنے کی کوشش کی، جس کی ویڈیوز سوشل میڈیا پر تیزی سے وائرل ہو رہی ہیں۔ رپورٹ کے مطابق، کوششوں کے بعد 2 لاکھ میں سے 1 لاکھ 91 ہزار روپے تو واپس مل گئے، لیکن 9 ہزار روپے کا کوئی سراغ نہ مل سکا۔
