امریکا نے دہشت گردی کے خلاف جاری عالمی مہم میں پاکستان کی اہمیت کو تسلیم کرتے ہوئے اسے ایک بار پھر اپنا اہم اور کلیدی شراکت دار قرار دے دیا ہے۔ واشنگٹن میں امریکی سینیٹ کی کمیٹی کو ایک اہم ترین سکیورٹی بریفنگ دیتے ہوئے امریکی سینٹرل کمانڈ (CENTCOM) کے سربراہ ایڈمرل بریڈ کوپر نے واضح کیا کہ خطے میں سکیورٹی کے بدلتے حالات اور مسلسل سکیورٹی خطرات کے باعث افغانستان اب بھی واشنگٹن کی خصوصی توجہ کا محور بنا ہوا ہے، جہاں سے اٹھنے والے خطرات پر پوری دنیا کی نظریں لگی ہوئی ہیں۔
بریفنگ کے دوران سینٹرل کمانڈ کے سربراہ ایڈمرل بریڈ کوپر کا کہنا تھا کہ افغانستان امریکی نگرانی کی فہرست (واچ لسٹ) میں بدستور پہلے نمبر پر موجود ہے، جبکہ وسطی ایشیائی شراکت دار ممالک بھی افغانستان کی سرزمین سے پیدا ہونے والے دہشت گردی کے ممکنہ خطرات پر گہری نظر رکھے ہوئے ہیں۔ انہوں نے اس صورتحال میں پاکستان کے کردار کو سراہتے ہوئے کہا کہ پاکستان انسدادِ دہشت گردی کی کوششوں میں امریکا کا ایک انتہائی قابلِ اعتماد شراکت دار ہے، جو خطے میں امن و امان کے قیام کے لیے مسلسل کام کر رہا ہے۔
ایڈمرل بریڈ کوپر نے مزید کہا کہ پاکستان خصوصاً داعش خراسان (ISKP) کے خلاف جنگ میں ایک کلیدی اور مرکزی حیثیت رکھتا ہے، اور پاکستان کے ساتھ امریکی فوجی شراکت داری کے نتیجے میں دہشت گردوں کے خلاف انتہائی ٹھوس اور مثبت نتائج حاصل ہوئے ہیں۔ ان کا کہنا تھا کہ یہ تمام تر کامیابیاں پاکستان اور امریکا کے درمیان قائم دیرینہ دوستی اور خطے سے دہشت گردی کے خاتمے کے لیے دونوں ممالک کے مشترکہ عزم کا براہِ راست اور واضح مظہر ہیں۔
