امریکی صدر ڈونلڈ ٹرمپ نے انکشاف کیا ہے کہ امریکی فوج نے آبنائے ہرمز میں امریکی ناکہ بندی کی خلاف ورزی کرنے والے ایک بڑے ایرانی بحری جہاز کو کارروائی کے بعد قبضے میں لے لیا ہے۔ صدر ٹرمپ کے مطابق، ایرانی پرچم والے اس مال بردار جہاز کا نام "توشکا” ہے، جو تقریباً 900 فٹ لمبا اور وزن میں ایک طیارہ بردار بحری جہاز کے برابر ہے۔
صدر ٹرمپ نے تفصیلات بتاتے ہوئے کہا کہ امریکی بحریہ کے گائیڈڈ میزائل ڈسٹرائر نے خلیج عمان میں "توشکا” کو رکنے کا اشارہ کیا اور وارننگ دی، تاہم ایرانی عملے نے اسے سننے سے انکار کر دیا اور سفر جاری رکھنے کی کوشش کی۔ صورتحال کو دیکھتے ہوئے امریکی بحریہ نے جہاز کے انجن روم میں سوراخ کر کے اسے ناکارہ بنا کر روک دیا۔ صدر ٹرمپ کا مزید کہنا تھا کہ جہاز اس وقت امریکی میرینز کے مکمل کنٹرول میں ہے اور اس کی تلاشی لی جا رہی ہے تاکہ معلوم کیا جا سکے کہ اس میں کیا سامان موجود ہے۔ اس واقعے کے بعد خلیج میں پہلے سے موجود کشیدگی مزید بڑھنے کا خدشہ پیدا ہو گیا ہے۔
