منڈی بہاؤالدین (نمائندہ خصوصی)
گورنمنٹ ہائر سیکنڈری سکول سوہاوہ بولانی میں پرنسپل و ڈسٹرکٹ فیلڈ آفیسر پیکٹا پیر مختار احمد بدر ، خالد پرویز (ایس ایس ٹی) اور محمد عارف (ای ایس ٹی) کے اعزاز میں ایک باوقار اور یادگار الوداعی تقریب کا انعقاد کیا گیا۔ یہ پروقار تقریب قائداعظم آڈیٹوریم میں منعقد ہوئی، جہاں اساتذہ، طلبہ اور اہلِ علاقہ کی کثیر تعداد نے شرکت کرکے اپنے محبوب اساتذہ سے والہانہ عقیدت کا اظہار کیا۔
تقریب کے مہمانِ خصوصی ڈسٹرکٹ ایجوکیشن آفیسر (سیکنڈری) عاکف ندیم تھے، جبکہ مہمانِ اعزاز کے طور پر سید محمد زبیر اکبر (ایس ڈی او واپڈا، منڈی بہاؤالدین) نے شرکت کی۔ ریٹائر ہونے والے معزز اساتذہ کا استقبال پھولوں کے ہاروں سے کیا گیا اور انہیں نہایت عزت و احترام کے ساتھ آڈیٹوریم میں لایا گیا، جہاں حاضرین نے تالیوں کی گونج میں ان کا پرتپاک خیرمقدم کیا۔
تقریب میں مقررین نے پیر مختار احمد بدر صاحب اور ان کے رفقائے کار کی تعلیمی خدمات کو زبردست خراجِ تحسین پیش کرتے ہوئے انہیں علم و عمل کا روشن استعارہ قرار دیا۔ مہمانِ خصوصی عاکف ندیم نے اپنے خطاب میں کہا کہ ایسے مخلص، باوقار اور فرض شناس اساتذہ کسی بھی ادارے کا حقیقی سرمایہ ہوتے ہیں، جن کی خدمات مدتوں یاد رکھی جاتی ہیں۔
مہمانِ اعزاز سید محمد زبیر اکبر نے بھی اپنے خیالات کا اظہار کرتے ہوئے کہا کہ یہ وہ عظیم شخصیات ہیں جنہوں نے خاموشی سے نسلوں کی تعمیر کی اور معاشرے کو علم کی روشنی سے منور کیا۔ اس موقع پر پیر مختار احمد بدر اور دیگر اساتذہ نے اپنے تاثرات پیش کرتے ہوئے جذبات سے لبریز انداز میں حاضرین کی محبتوں کا شکریہ ادا کیا۔
تقریب کا ایک روح پرور لمحہ وہ تھا جب تمام حاضرین احتراماً کھڑے ہوگئے اور دیر تک تالیوں کی گونج میں اپنے اساتذہ کو خراجِ تحسین پیش کرتے رہے، گویا فضا بھی ان عظیم ہستیوں کے احترام میں جھک گئی ہو۔
پروگرام کی نقابت ڈاکٹر مظہر اقبال نے نہایت دلنشین اور پراثر انداز میں سرانجام دی اور اپنے سلیس و شگفتہ کلام سے محفل کو ایک ادبی رنگ عطا کیا۔ تقریب کی کامیابی میں رانا صغیر احمد ، سید مبشر اقبال ، خالد محمود اور دیگر اساتذہ کرام کا خصوصی تعاون شامل رہا۔ ہال کی تزئین و آرائش میں ڈاکٹر خلیل ، ظفر اقبال بھٹہ اور محمد عمران نے نمایاں کردار ادا کیا، جبکہ محمد ارشد (پی ای ٹی) نے انتظامات اور نظم و ضبط کو نہایت احسن انداز میں سنبھال کر تقریب کو کامیابی سے ہمکنار کیا۔
تقریب کے اختتام پر پرتکلف ضیافت کا اہتمام کیا گیا اور ریٹائر ہونے والے اساتذہ کرام کو محبت و عقیدت کے ساتھ قیمتی تحائف پیش کیے گئے۔ یہ الوداعی تقریب نہ صرف ایک رسمی تقریب ثابت ہوئی بلکہ جذبات، یادوں اور خدمات کے اعتراف کا ایک ایسا حسین امتزاج بنی جسے منڈی بہاؤالدین کی تعلیمی تاریخ میں ہمیشہ یاد رکھا جائے گا۔
