واشنگٹن میں امریکی وزیر خارجہ کی زیرِ صدارت ہونے والے سہ فریقی اجلاس میں اسرائیل اور لبنان کے درمیان سفارتی تعلقات اور امن کے قیام کے حوالے سے بڑی پیش رفت سامنے آئی ہے۔ امریکی محکمہ خارجہ کے مطابق، اس اہم ملاقات میں اسرائیل نے لبنان کے ساتھ مل کر خطے میں موجود غیر ریاستی مسلح گروہوں کو غیر مسلح کرنے کے پختہ عزم کا اعادہ کیا ہے۔ مذاکرات کے دوران اسرائیلی حکام نے تمام تصفیہ طلب مسائل کو حل کرنے کے لیے لبنان کے ساتھ براہِ راست مذاکرات جاری رکھنے پر رضامندی ظاہر کی ہے، جبکہ لبنان کی جانب سے فوری جنگ بندی اور ملک میں جاری انسانی بحران سے نمٹنے کے لیے ہنگامی اقدامات کا مطالبہ کیا گیا ہے۔ فریقین نے باہمی مشاورت سے طے شدہ مقام اور وقت پر براہِ راست مذاکرات کے باقاعدہ آغاز پر اتفاق کر لیا ہے جس پر امریکی محکمہ خارجہ نے اُمید ظاہر کی ہے کہ یہ سلسلہ ایک جامع امن معاہدے پر منتج ہوگا۔ تاہم، ان سفارتی کوششوں کے باوجود لبنان پر اسرائیلی حملوں کا سلسلہ برقرار ہے، جہاں گزشتہ چوبیس گھنٹوں کے دوران مزید 35 افراد کی جانیں جا چکی ہیں
