ورلڈکپ ہاکی 2026 میں بھارت کے خلاف اہم میچ سے قبل پاکستان ٹیم نے اپنا پریکٹس سیشن منسوخ کر دیا ہے۔ نیدر لینڈ اور بیلجئیم میں منعقدہ ایف آئی ایچ ہاکی ورلڈ کپ میں 19 اگست کو پاکستان اور بھارت کے درمیان ایمسٹلوین کے ویگنور اسٹیڈیم میں پاکستانی وقت کے مطابق شام 6 بجے بڑا مقابلہ کھیلا جائے گا۔ گروپ ڈی سے انگلینڈ کی ٹیم پہلے ہی اگلے مرحلے میں جگہ بنا چکی ہے جبکہ دوسری ٹیم کا فیصلہ پاکستان اور بھارت کے درمیان ہونے والے اس براہ راست میچ کی بنیاد پر ہوگا۔
یاد رہے کہ ایونٹ میں پاکستان کو انگلینڈ کے ہاتھوں 1-4 سے شکست کا سامنا کرنا پڑا تھا جبکہ ویلز کے ساتھ میچ 3-3 گول سے برابر رہا تھا۔ دوسری جانب بھارت نے ویلز کو 1-3 سے ہرایا تھا جبکہ اسے بھی انگلینڈ کے خلاف 2-4 سے شکست ہوئی تھی۔ اب پاک بھارت روایتی حریف ٹیمیں آمنے سامنے ہوں گی، اور جو ٹیم یہ میچ جیتے گی اسے اگلے مرحلے کا ٹکٹ مل جائے گا۔ ایمسٹرڈیم میں منگل کے روز پاکستان ہاکی ٹیم کے کھلاڑیوں نے ہوٹل میں آرام کیا اور پریکٹس سیشن منسوخ کر دیا، جبکہ ٹیم مینجمنٹ بھارت کے خلاف میچ کے لیے خاص حکمت عملی کے ساتھ میدان میں اترنے کے لیے کھلاڑیوں کی حوصلہ افزائی کرتے ہوئے انہیں اس ہائی وولٹیج مقابلے سے قبل ایک آرام دہ ماحول فراہم کر رہی ہے تاکہ وہ بہترین کھیل کا مظاہرہ کر سکیں۔
