اسلام آباد میں حکومت اور اپوزیشن کے درمیان کافی عرصے بعد برف پگھلنا شروع ہو گئی ہے اور اسی سلسلے میں حکومتی وزراء نے اپوزیشن رہنماؤں سے اہم ملاقات کی ہے۔ مسلم لیگ ن کی جانب سے رانا ثنااللہ، طارق فضل چوہدری اور وزیر قانون اعظم نذیر تارڑ نے پارلیمنٹ ہاؤس میں اپوزیشن چیمبر کا دورہ کیا جہاں انہوں نے اپوزیشن لیڈر محمود خان اچکزئی سے ملاقات کی، جبکہ سینیٹ میں اپوزیشن لیڈر راجہ ناصر عباس نے بھی اس ملاقات میں بھرپور شرکت کی۔
ملاقات کے بعد میڈیا سے گفتگو کرتے ہوئے رانا ثنااللہ نے بتایا کہ محمود خان اچکزئی نے وزیراعظم کو ایک خط لکھا تھا جس کا جواب وزیراعظم دے رہے ہیں، اور اسی معاملے پر باضابطہ مشاورت کے لیے وزراء محمود خان اچکزئی کے پاس آئے تھے۔ اس موقع پر وفاقی وزیر طارق فضل چوہدری کا کہنا تھا کہ اپوزیشن سے بات چیت اب مزید آگے بڑھ سکتی ہے کیونکہ وزیراعظم شہباز شریف اپوزیشن کے خط کا باقاعدہ جواب دیں گے، اور پیر کے روز ہونے والی اس ملاقات سے یقیناً جمود ٹوٹے گا اور معاملات مثبت سمت میں آگے چلیں گے۔
طارق فضل چوہدری نے واضح کیا کہ بانی پی ٹی آئی عمران خان کی صحت پر کوئی کمپرومائز نہیں کیا جائے گا اور انہیں پہلے سے بہتر طبّی سہولیات فراہم کی جائیں گی۔ اس کے علاوہ انہوں نے ایک اور سوال کے جواب میں واضح کیا کہ حکومت کے زیرِ غور اس وقت نئے صوبوں کے قیام سے متعلق کوئی تجویز موجود نہیں۔
